Kaffisoriarneq: Qunerseeq Rosing

Qunerseeq Rosing
Nal. 1900 kasuttorpugut sila taarsereersoq – Qunersiip matu armarpaa radioaqqani paaralugu unnersiorluni ilumut arfineq marlunngoqqissaarnerarlugu radio aviisip qallunaatoortaa aallartimmat.
Arnat tallimaalluta, soorlu arnarruulersut, isaavugut torsuusaaqqamilu kavaajagut kamippagullu peerlugit – ila torsuusaaraa milleriaannarpoq inoqarnermut. Qunersiittaaq kingusinnerusukkut oqaatigaa ilumut torsuusat Tuujummiittut mikivallaartaqisut – ilami uagut issittormiuugatta atisarpassuaqarluta inituunik.
Inimut tamatta issaavugut – ila ininngua nuanningaarmat tuujummut nuukkusuleraluarpunga. Soorlu illuaqqamiilluni sila taartoq illup iluani naneruuteeralerluta oqalualaartugut.
Qunerseeq Rosing ukiut arlalippassuit Tuujummi ukiuunerani najugaqarsimavoq. Iluareqaa illoqarfimmut qaninnera pisuinnarluni nikilaarsinnaasarami. Illut akuttuneri silaannaqarluarnerilu anersaarfissaqarluarluni iluareqaa. Inigisaminiit isikkiveqannginnini ajorinngilaa ilami aasakkut isikkivigissuaq pigisaramiuk Kapisilinniikkaangami.
Tuujummi najugaqarluni nuannersut ilagaat biileqarpiarneq ajorami – soorlu qallunaatut taallugu ”en oase”. Najugarfik sernigaq, eqqissisimanartoq, biileqanngitsoq, qorsooqqittorlu. Iluareqaattaaq aqqusineq silatiminiittoq ataatsip tungaannaanut ingerlavissaqarmat taamaattumillu biileqarpianeq ajorluni biilillu nipiliorpiarneq ajorlutik.
Qunersiittaap eqqaavaa assut iluaralugu inuusuttut, meeqqat utoqqaallu tuujummi eqqarmioriillutik najugaqatigiinnerat. Kisiannili nuanninnginnerusut ilagaat tarnikkut nappaatillit sanilerissallugit –
Qunerseeq: ”ataasiarlunga tarnimik nappaatilimmik siorasaarneqarnikuuvunga taannalu maanna sanileraara” toqqiissisimanarpoq tarnimikkut nappaatilinnik sanileqarluni nalunartarami qanoq ulloqarnersut – tassanngaannaq susoqariataarsinnaagami. Inuit tarnimikkut nappaatillit immikkut najukkami navianaallisakkami najugaqartariaqarput”.
Inissiassamut sinnattut eqqaassagaanni Qunersiip makkua sinnattorisinnaavai:
- ”Ini igaffimmut ataannartoq – silaannaqalernerulerniassammat maannamit piviusunit. Torsuusaq anginersusoq kavaajanut inissaqarluartoq, minnerunngitsumillu aamma igaffik pisaanik sukujunnillu assigiinngitsunik passussiviusinnaasoq”.
- Aammattaaq queqarnissaa pingaarpoq sukujunnik ilioraavigineqarsinnaasoq.
Illut akorngi eqqaassagutsigit kissaatigisinnaavaa nunataq nuannernerusumik isikkuminarnerusummillu piusuuppat. Pingaarporli nunataq taanna imminut paarisinnaanera ullut tamaasa paarisariaqarnani inunnik sumiginnagaanissaa anigorniaralugu.
Pingaatsippaattaaq najugaqatigiinni inunnik arlalinnut katersortarfiusinnaasumik qaaqqusiffiusinnaasumillu illoqarsinnaasuuppat – inuinnaat pilutaq illullu allat atoneqarsinnaasut akisuallaartaramik.
Qunersiittaaq eqqaavaa russit ukiumi isseqisumi silami qitittarnerat – sooq uagut kalaallit aamma silami kalattoortarsinnaanngilagut?
Anitinnata ineeraa angalaarfigilaarparput tassanngaanniillu Piamut ganngikkoorluta kasuttoriartorpugut.